歌手:21Zem无魂
专辑:《念 དུང MISS》

作词 : 21Zem无魂
作曲 : 21Zem无魂
ངའི་སེམས་འདི་སྟོང་ལྷིང་ལྷིང་།
རླུང་བུ་འདི་འཁྱག་སིབ་སིབ།
འཇིག་རྟེན་ལ་དབྱར་གྱིས་དུས་ཚིགས་སླེབས་ཡང་།
ངའི་སེམས་སུ་དགུན་གྱི་མིག་ཆུ་འཐོར་ཡོང་།
ངས་བསམ་ན་ང་ནི་ཁེར་རྐྱང་ལ་སྐྲག་བཞིན་ཡོད་པ་འདྲ།
དེ་མ་གཏོགས་ང་ལ་འཇིག་རྟེན་འདིར་ཞེན་ཆགས་ཅི་ཡང་མེད་པའི་
སྟོང་བར་སྣང་བའི་ཚོར་བ་འདི་འདྲ་ཞིག་སྐྱེས་དགོས་དོན་མེད་ཁི
ངས་བསམ་ན་ད་ལྟ་ང་ལ་འགྱོད་པ་ཡིས་ཁེངས་འདུག་པ་འདྲ།
དེ་མ་གཏོགས་ང་ལ་དབང་བའི་མཛེས་སྡུག་དེ་གཞན་གྱིས་བརླག་འགྲོ་བསམ་ནས་སེམས་འཁུར་བྱེད་དགོས་དོན་མེད་ཁི
སྔོན་ཆད་ཀྱི་སྐྱིད། ད་ལྟ་ཡི་སྡུག
རྣམ་པར་བཀྲ་བའི་མེ་ཏོག་ལ་སྔོན་འགྲོ་མེད་པའི་ཆར་བ་དེ་ཡིས་རྒུད་པར་བཏང་བ་བཞིན
ཁ་སང་གི་ང་། དེ་རིང་གི་ཁྱོད།
སུས་ཡང་རྟོགས་མི་སྲིད་པའི་ཚོར་བ་སྣོན་པོ་དེ་དུས་ཚོད་ཀྱིས་ཡལ་བར་བཟོས་བ་བཞིན།
ད་དུང་ཐེངས་གཅིག ཡང་བསྐྱར་ཐེངས་གཅིག
བཤད་པའི་སྐད་ཆར་བརྩེ་བ་མ་མང་ན།
གྲང་ཞིང་འདར་བའི་ལུས་ཕུང་འདི་ལ་དྲོད་ཀྱིས་ཁྱབ་པར་བྱེད་དཀའ་བས།
གུ་ཡངས་ཐེངས་གཅིག དགོངས་དག་ཐེངས་གཅིག
བྱམས་དང་ལྡན་པའི་མིག་གིས་མ་བལྟས་ན།
དུང་བ་ཉུང་བའི་དམར་པོ་སྙིང་ཆུང་འདི་ལ་བརྩེ་དུང་ཟབ་མོའི་རྐང་རྗེས་འཇོག་དཀའ་བས།
འགྱུར་སླ་བའི་བརྩེ་དུང་ཟེར་བའི་ཚོར་སྣང་གི་འཇིག་རྟེན་དེ།
བརྗེད་སླ་བའི་མི་དང་མིའིི་བར་གཟུགས་མེད་ཀྱི་འབྲེལ་བ་དེ།
ཡོད་སླ་བ་ནི་དགའ་བའི་སེམས་དེ་ཡིན་ཡང་།
སྒྲུབ་མི་སླ་བ་ནི་འཚོ་བའི་ཁྲོད་ཀྱི་དགའ་སྐྱོ་ཆགས་སྡང་དང་འབྲེལ་བའི་
སེམས་ཁམས་དེ་དག་དང་རྣམ་འགྱུར་དེ་དག་ཡིན་པས།
བརྩེ་དུང་ནི་གནད་དོན་ཞིག་མིན་ཡང་བརྩེ་དུང་དང་འགྲོགས་སྟེ་ཡོང་བའི་
གནད་དོན་དེ་དག་ནི་བརྩེ་བ་འགྱུར་ཞིང་དུང་བ་མེད་པའི་རྒྱུ་རྐྱེན་དུ་འགྱུར་ངེས།
ཡིན་ཡང་། ཁྱོས་ང་ལ་ཡིད་ཆས་ཡོད་ཞེས་བརྗོད་པའི་ཉིན་མོ་དེ་ནས་བཟུང་།
ངས་ཁྱོད་ལ་རང་གི་ནུས་བ་དང་མཐུན་པའི་བདེ་སྐྱིད་ཅིག་སྐྲུན་འདོད།
བདེ་སྐྱིད་དེ་རྒྱུ་འབྱོར་དང་འབྲེལ་བ་མེད།
བདེ་སྐྱིད་དེ་ལས་དབང་དང་འབྲེལ་བ་མེད།
བདེ་སྐྱིད་དེ་ནུས་བ་དང་ལྷག་ཏུ་འབྲེལ་བ་མེད།
བདེ་སྐྱིད་དེ་ཁྱོད་མ་གཏོགས་འབྲེལ་བ་ཅི་ཡང་མེད།
དམ་བཅའ་ནི་འགྱུར་སླ་བའི་ཕུགས་འདུན་དེ་ཡིན་ན།
རྨི་ལམ་ནི་འགྱུར་མེད་ཀྱི་དམ་བཅའ་དེ་ཡིན་ངེས།
ཁྱོད་ལ་འཕྲེང་བའི་རྣམ་ཤེས་འདི་ནི་རླུང་བུ་བཞིན་དུ་ཡང་ཞིང་གཡོ་བས
་ང་རང་ཉིད་ཀྱིས་ཡང་ཚོད་འཛིན་བྱེད་མི་ཐུབ་ལ་ཚོད་འཛིན་བྱེད་ཡང་མི་བསམ།
མ་འོངས་དེ་དཀའ་ངལ་ཆེ་ཡང་འགྲོ་ཐབས་འདུག་ཐབས་ཙམ་གྱི་ད་ལྟ་ལས་དོན་སྙིང་མཆིས་ཞིང་
རིན་ཐང་ལྡན་པར་འདོད་པའི་རང་དབང་གི་སེམས་ཚོར་དེ་ཡིན།
ངའི་སེམས་འདི་སྟོང་ལྷིང་ལྷིང་།
རླུང་བུ་འདི་འཁྱག་སིབ་སིབ།
འཇིག་རྟེན་ལ་དབྱར་གྱིས་དུས་ཚིགས་སླེབས་ཡང་།
ངའི་སེམས་སུ་དགུན་གྱི་མིག་ཆུ་འཐོར་ཡོང་།
སྙིང་སྡུག་གི་ཁྱོད་ནི་ང་རང་བཅིངས་གྲོལ་ཏུ་གཏོང་བའི་བད་ེསྐྱིད་ཀྱི་ཉི་ཟེར་དེ་ཡིན།
མཚར་སྡུག་གི་གཏམ་རྒྱུད་འདིའི་བརྗོད་བྱ་དང་དོན་སྙིང་ཡིན།
ངའི་མི་ཚེ་འདིའི་དགོད་སྒྲ་ཡི་བདག་མོ་ཡིན། ངའི་རྣམ་ཤེས་ཀྱི་གྲིབ་གཟུགས་ཡིན།
བར་ཐག་རིང་སོང་བས་
ང་ལ་ལན་རེར་འཇིགས་སྣང་དང་བཤད་མི་ཤེས་བའི་ཚོར་བ་རེ་སྐྱེས་བ་འདི་དག་གིས་
ང་ཁྱོད་དང་བྲལ་བའི་འཚོ་བ་འདི་ལ་དགའ་བཞིན་མེད་པ་མཚོན་ལེ་ཐུབ།
ཁྱེད་དང་འཕྲད་ན་ངའི་སེམས་འཁུར་དང་འདང་རྒྱག་ཚང་མ་ཡལ་འགྲོ་བ་འདི་ཡིས་
ང་ཁྱོད་རང་མཆིས་བའི་གནས་བབས་འདི་ལ་ཇི་འདྲའི་ཆགས་བཞིན་ཡོད་པ་མཚོན་ལེ་ཐུབ་།
ཡང་ན། ངའི་ལུས་ངག་ཡིད་གསུམ་གྱི་ཚོར་སྣང་དེ་དག་ཁྱོད་ཀྱིས་ཚོད་འཛིན་བྱས་པ་དང་
འདས་མ་ད་གསུམ་གྱི་དགའ་སྐྱོ་ཆགས་སྡང་དེ་དག་ཁྱོད་དང་འཕྲད་པའི་ལས་བསྐལ་འདི་ཡི་ཆེད་དུ་ཡིན་པ་མཚོན་པས་རེད།
དགའ་ན་ཁྱོད་ཀྱི་ཆེད་དུ་དགའ་བ་བརྩེ་དུང་ཡིན་ན།
སྡུག་ན་ཁྱེད་ཀྱི་དོན་དུ་སྡུག་པ་ཡང་བརྩེ་དུང་ཡིན་ངེས།
སྙིང་ཁོངས་ཀྱི་གཅེས་ཕྲུག་ཁྱོད་ནམ་ཡང་ཁེར་རྐྱང་མིན་ཏེ།
ང་ནམ་ཡང་མཚན་མོའི་སྐར་ཚོགས་ཀྱི་གསེང་ནས་ཁྱོད་ལ་བལྟ་བཞིན་ཡོད་ལ།
ཉིན་མོའི་མཁའ་དབུགས་ཀྱི་བུང་ན་ཁྱོད་ལ་འཐམ་བཞིན་ཡོད།
ཁྱོས་ཕྱིར་མིག་ཞིག་བལྟས་ན་ང་ཁྱོད་ཀྱི་བརྒྱབ་ཕྱོགས་ན་ནམ་ཡང་རྒྱང་རིང་ལ་འགྲོ་མི་འདོད་པ་ཁྱོས་ཤེས་ངེས།
ཁྱོས་འཛུམ་མདངས་ཞིག་ལྟན་ན་ངས་ཡོད་ཚད་ཕར་ལ་གཡུག་དེ་ཁྱོད་གཅིག་པུའི་ཆེད་དུ་རྒྱུགས་ཡོང་བ་ཁྱོས་ཤེས་ངེས།
ཁྱོས་ཕྱོགས་སུ་བལྟས་དུས་འཇིག་རྟེན་འདིའི་གཞི་མ་ཁྱོད་ཡིན་ལ།
སེམས་ཁོངས་ཀྱི་སྤྲོ་བ་དང་སྐྱོ་བའི་ངང་ནས་ཐོན་པའི་མིག་ཆུ་ཡང་
ཁྱོས་གམ་ནས་མ་གཏོགས་ལུས་སྟེང་ནས་མཐོང་མི་སྲིད།
ཁྱོད་མ་གཏོགས། ང་རང་བྱིས་པ་བཞིན་གཅེས་ཤིང་བྱིས་པ་བཞིན་དགོད་ཡང་དེ་ལས་མི་སྲིད།
ཁྱོད་ཀྱི་ལུས་ཕུང་ནི་ད་གཟོད་ང་ངལ་དུབ་པའི་དུས་སུ་ངལ་གསོ་བྱེད་འདོད་སའི་དྲོད་ཁོལ་དེ་ཡིན་ལ།
ཁྱོད་ཀྱི་འཛུམ་མདངས་ནི་ངས་བསྐྲུན་འདོད་པའི་མཚར་སྡུག་གི་མ་འོངས་ཀྱི་སྙིང་བོ་ཁོ་ན་ཡིན།
སྐྱོ་སྐྱོ་མ་གནང་། ངའི་སེམས་ཀྱི་གཅེས་ཕྲུག ང་ནི་ཁྱོད་དང་ལྷན་དུ་ཡོད་པས།
ངུ་ཡང་དགོས་དོན་མེད། ངས་ཁྱོད་ལ་དགའ་འོས་བའི་རྒྱུ་རྐྱེན་ཞིག་འཚོལ་ངེས།