歌手:任剑辉
专辑:《帝女花》

（世显白）所谓有福依然在，无福莫强求，
你同我都系个冇福嘅咯，讲咁多做乜嘢呀。
（秦道姑食住此介口衣边卸上白）
阿弥陀佛，等我出去睇吓做乜嘢至得。

（周钟白）哎呀，我同你又点同。
你睇吓你呀，两额低削成个样削泻嘅，
冚家都泻晒落去啦，无福无福。
我就唔同喔，我摆出成个都系有福之人。
俾你咁陀累就唔抵啦！唉，张千！
（张千白）老爷。
（周钟白）嚟嚟嚟，你个奴才！
你个奴才！你个奴才！
我早就唔信一个人有死后回生之说嘅，
你究竟响边处见过公主呀，
呢间庵堂，你睇下有冇公主喺处，
咪就系除左呢只咁嘅鸭扑老道姑之外，
仲有几多个弱质娉婷呢，睇下！
（张千白）老爷，我正话响残桥之上，
亲见睇到呢位师父同埋阿公主一齐入庵堂门口嘅。
（周钟白）係呀，真嘅？
（秦道姑台口白）啊，现在我明白咯，
（背景周钟白：真唔真㗎？张千白：係呀。）
原来慧清就係先朝嘅公主，怪不得我在十年前到嚟维摩庵，
与我十年之后再到来维摩庵，见慧清都完全唔同样，
莫非老姑姑佢移花接木？
哎呀！我我错咯，我待慢公主，我刻薄公主，
我要在观音菩萨面前请罪，
请佢恕我不知之罪咯观音菩萨！

（周钟硬着头皮上前拜白）啊啊啊…我醒嘞，
我醒起嘞。哎呀，行开，得嘞得嘞得嘞。
阿显，唔係噃，我呢趟要求你，你有福喔，你成个有福喔。
（世显白）哎，我冇福嘅，两额低削，
睇我个相，成个都泻晒嘅。
（周钟白）嘻嘻嘻，唔怕，泻唔怕。
你下巴兜，乜嘢都兜住嘞嘛。
喂，显呀，公主真係唔係尚在人间呀，
我真系要重拜驸马爷啦，驸马显。
（世显食住白）折福，折福！
（周钟白）唔係咧。
（世显白）福薄人担当不起。
（周钟着急白）当得起。
（周钟滚花下句）唉，
所谓有香唔在东风映，恕老臣肉眼太无精。
先朝彩凤在人间，天降红鸾重照周郎命。
（叫白）驸马爷，驸马爷，驸马爷。
（世显不应介）
（周钟哀求哭白）唉，驸马爷。
老臣之所以三折腰者，无非为儿孙做福矣。
点解叫咗你咁多声你总唔应下我一句呢，驸马爷。

（世显滚花下句）夷齐耻食周朝粟，
怕只怕明朝帝女亦耻降清，
未迎旧凤入新朝，
你唤尽千声谁敢应。
（周钟嬉皮笑面白）公主肯嘅，肯嘅。

（滚花下句）自有宽容如清帝，岂无特例慰崇祯，
佢话随身不须换朝衣，仲会赐邑封藩显尽佢嘅慈祥性。
（世显白）公主翻去都得，佢係有条件嘅噃。
（周钟疑白）有乜嘢条件啊？

（世显）前朝一朵帝女花，劫后依然存傲性。
佢不着新朝衣，不听新朝命，
至少有十二宫娥粧台伴，十丈红绒铺花径。
从臣皆着明朝服，公主入朝不改清朝姓。
（周钟白杬）些少条件何足论，清帝慈祥佢当答应。
速速带我访去妆台，好待老臣重孝敬。
（拖世显欲下介白）去喽，去喽。
（世显摇头不肯介口古）咪住咪住，
你应该先带我去见清帝，然後我翻嚟回覆至有话柄㗎。
（周钟点头口古）咁啊？呃…得得得！
依家日上三竿，正是午朝时候，
不如我共你飞马先入文渊阁拜访沈昌龄。
（世显白）好！
（世显滚花下句）个中自有玄机在，谁慕新恩负旧情。
（周钟白）哎，驸马请，驸马请！
（与周钟同下介）

（瑞兰下介长句滚花下句）开尽纸糊窗，望断花台路，
花径为谁勤打扫，盼求彩凤返青庐，
落红又报三春老，末见人归伴孤影。
又怕公主敲一世青磬红鱼，也难乞取慈航普渡。
(白)我都经已去过庵堂，探望过公主，
怎奈佢有心削发无意红尘，
任我劝尽千声，佢一样欲哭无泪。唉。
（诗白）正是小楼花落知多少，问谁怜惜帝花娇。
（上小楼在台檀炉烧香介）

（长平上台口滚花厂句）纤腰无力金莲细，病喘何堪涉长途。
青莲有界隔尘寰，怜我劫余离净土。
（瑞兰一见长平愕然高呼白）公主。
（长平一闻公主二字惊介左右张惶介）
（瑞兰急白）瑞兰叩见……
（瑞兰口古）我今晚准备焚香祷告，默祝公主安宁之后，
我就关闭纸糊窗永垂青纱帐，
杜绝我凭栏之念嘅嘞，
估唔到我在于绝望之时，你飘然又到。

（长平口古）唉，瑞兰，
我清修一年，本来都已炼得心如止水嘅咯，
谁料又遇见果个痴情驸马，又试倒起波涛咯。
（羞介）（瑞兰白）哎呀，公主，咁就好咯。

（滚花下句）我为你把青丝挽作蟠龙髻，
胭脂抹去泪痕污。
今夕小楼移作武陵源，柳台翻作桃源路。
（扶长平羞怯怯上小楼介）

（十二官娥拈凤冠，瑕佩，世显与周钟打马上介）
（世显中板下句）黄金嫩柳拂龙袍，似是仁慈清世祖。
恩迎驸马恋新槽。系马疎林，（与周钟同时下马介）（滚花）转入花间路。
（周钟认路越骑介拖住世显白）咪住咪住，驸马。
（滚花下句）你是否去雨站云台迎彩凤，抑或去侮溪小巷访蜗庐，
呢度小楼一角是我旧时居，几时变作神仙岛。
（周钟白）你有冇行错咗路㗎驸马。
（世显白）冇呀，呢度係唔係紫玉山房啊？
（周钟愕然白）咦，你点知呢？係啊係啊。
呢间紫玉山房系我在前朝嘅时候所建成嘅，
旧时就系我老妻养静之地，而家就係我小女瑞兰避尘之所。
哦？喂喂驸马，你到底嚟揾公主呀抑或嚟揾瑞兰㗎？
（世显笑介白）揾边个都系一样啫。
（周钟白）哦？
（瑞兰在小楼复见楼下车马盈门愕然凭栏一望先见世显大喜，再见周钟大惊欲回避介）
（周钟暍白）欸欸！瑞兰，落嚟落嚟见下我。
（瑞兰落楼冷然曰）阿爹……
（周钟口古）瑞兰，乜你见到爸爸好似见鬼咁嘅哈？
嚟嚟，我问声你，公主点解会死后回生，又点解会住响你嘅兰闺绣户，快讲！
（瑞兰冷然一笑口古）阿爹，世无死后回生之人，
但有偷梁换柱之计噃，我不屑你出卖长平公主，
当年栘花接木都尽在一件道姑袍啫。
（周钟重一才悲愤介白）嘿，后生女…哎！
（世显白）周世伯，乜你令千金话你出卖公主咩？！
（周钟白）呃…唔系，唔系…
因为呢间屋旧时我係一度想出卖过，
公主呢，确系响处，
咁你头尾果滴又唔听，单单听到出卖果两个字啫嘛…
（世显白）瑞兰小姐，劳烦你快请公主出来，
你话驸马亲来迎接咁话啦。
（瑞兰冷然一笑）我知啦。

（长平见楼外景惊愕介滚花下句）
今夕小楼迎驸马，何来车马绕门庐。
尚有宫娥鱼贯列楼前，十丈红绒铺人花间路。
（瑞兰白）公主，乜你望唔到驸马咩。
（滚花下句）世显不是琴台客，原是豪门逐臭夫。
佢今宵将网缚凤还巢，你更难向慈航求普渡。
（世显，周钟食住同时抬头叫白）公主。
（长平内心误会渐深欲晕苦笑白）驸马爷，乜你嚟咗嘞咩。
（世显白）公主请下楼。
（长平一路落楼一路唱慢板下句）
云髻新簪夜合花，彩线戍成新样谱，
梵台走脱丹山凤，引来百鸟绕青庐。
（世显趋前接住长平慢板上句）此来不御旧羊车，十里搬来新凤辇，
十二宫娥，齐向金枝拜倒。
（两旁宫娥躬身下拜）
（长平内心悲愤但仍但仍忍住苦笑口古）驸马爷，你果然係一个守信用之人，
不枉我在庵堂对你再度倾心，更不枉我在小褛今夕为你安排好合欢筵酌。
係咯驸马爷，点解你霎时之间，又会得来—件紫罗袍，乌纱帽。
（世显装儍扮懵嬉皮笑面介口古）公主，所谓天有不测风云，人有霎时祸福，
一者我有应变之能，二者难得清帝有慈悲之念，
将我重新赐封驸马，重叫我迎接呢只离巢彩凤重返宫曹。
（周钟白）会讲说话。
（长平重一才色变慢的的渐转平复强笑口古）哦，原来驸马你有应变之能，
咁真不枉先帝在城破之日仲将你赐封驸马，
在血染乾清之时，重对你再三怜惜。
係呢驸马爷，点解清帝佢忽然之间又会待你咁好㗎。
（世显口古）公主，清帝唔係待我好，不过係待你好啫。
佢睇念先帝爱女之心，依家为佢完成一点未完嘅责任，
替我地重新匹配，都可算义比天高。
（长平捧心微抖半晌不能言介）
（周钟白）公主，呢次唔止你同埋驸马行运喔，你带挈老臣全家都行好运嘞！
（滚花下句）公主你见否有十二宫蛾皆御赐，最难得係从臣不换旧官袍。
更为萧郎筑凤台，御赐平阳驸马府。
（瑞兰悲愤滚花下句）阿爹！
君子未贪嗟来食，又几见前朝驸马恋新槽。
怪不得话君非亡国君，亡在群臣无抱负。

（长平不能再忍执世显口古）驸马爷，咁既然清帝咁仁慈，
派来宝马香车，咁你以为哀家应该点样做呢。
（世显故作洋洋得意嬉笑口古）公主，我以为我地合欢筵桌，
摆在小楼一角就略显局促嘞，应该摆在深宫大殿，
受千人拜，万人拜，一声百诺，后拥前呼。
（长平唾世显面介口古）周世显！你…你…你原来係鱼目混珍珠，
枉费哀家我将终身嚟托付。我唾！（哭介）
（周钟惊白）哇，抹翻佢，抹翻佢，抹翻佢。
（世显佯作绝不难堪，见长平痛哭又不忍介口古）唾面都可以自干，夫妻情难反目。
公主，做人应该要随机应变，你又何必惨切哀号呢？
（长平气至半晕瑞兰扶住介）
（周钟见情势不对，急白）公主，
（乙反木鱼）自古话因风使悝至能摇橹，逆水撑船费工夫，
若果话青磬红鱼能终老，试问世间谁个不把禅逃。
有斟有酌至成夫妇，驸马係可以搓圆㩒扁嘅好丈夫。
宫娥啊，你地快些滴退入花间路。
（十二宫娥分边卸下）
瑞兰，行翻入去，都不用你再参扶。
（瑞兰晦气下介）
（周钟白）驸马爷啊，趁此四下无人，
你要俾滴心机劝解下公主，老臣告退嘞。
（卸下介）
（世显见无人急上前白）公主，公主。
（长平埋枱拈银簪在手截住要胁介白）你咪行埋嚟！
（秃头起禅院钟声尾睱唱）名花，不配被俗世污，
银簪，阻断了配婚路。
当初先帝悲金鼓，两番挥剑灭奴奴，
要我存贞操，殉父母，
我虽是人还在世，你那堪卖我毁清操，
清室今朝有金铺，我也不再爱慕！
骂句狂夫！匹夫！共你恩销，义老，我自剌肉眼模糊。
（擧簪欲剌目介）
（世显急欲阻白）公主！公主！
（完）