德吉老爷的一封信（DJ阿智 Remix）

ཁྱིམ་ཚང་ཞིག་གི་ཐབ་ཚང་ནས།
གཟིམ་མ་མྱོང་བའི་མར་མེ་ཚེ་འབར་ལགས།
ད་ཕྲུག་ཁྱོད་ཀྱི་རེ་སྒུག་གི་འདུན་མ།
བཅངས་པའི་སེམས་ཀྱི་ཡབ་ཆེན་ལགས།
ངས་ཁྱེད་ལ་ཞུ་འཕྲིན་སེམས་ཀྱི་མཆོད་པ་ཕུལ།
ཞོགས་པའི་ལྷ་བསངས་གཏོང་དུས།
རླུང་རྟ་དགུང་ལ་མཆོད་ཡོད།
ཀི་བསོ་ཡི་བསྟོད་པའི་དུ་སྤྲིན་ལ།
གསོལ་འདེབས་ཀྱི་སྨོན་ཚིག་ཁྲི་འབུམ་བསྐུར་ཡོད།
ཡུན་རིང་བྲལ་བའི་རྒྱང་རིང་གི་སེམས་ཀྱི་ཡབ་ཆེན་ལགས།
ཁྱེད་རང་སྐུ་ཁམས་བདེ་ལགས་སམ།
རང་ཁྱིམ་དྲོད་ཀྱིས་སྟོང་བའི་གཞི་བྱེས་ཀྱི་ཕུ་ནུ་མིང་སྲིང་ཚོ།
ཁྱེད་རྣམ་པ་ཕུང་ཁམས་བདེ་མོ་ཡིན་ལགས།
རྩྭ་ཐང་འཁྱགས་ཀྱིས་བསྡམས།
སྦྲ་གུར་རླུང་གིས་བསྐྱོད་པའི་ཕ་ཁྱིམ་ན།
བདག་མེད་ཤུལ་ལུས་ཀྱི་སྤུན་ཟླ་མིང་སྲིང་ཚོ།
སྡུག་བསྔལ་གྱི་མིག་ཆུ་ཁྲོམ་ཁྲོམ་ལས།
བདེ་སྐྱིད་ཀྱི་དགོད་སྒྲ་ཐོས་མ་མྱོང་།
དྲན་གདུང་གི་ཤུགས་རིང་མནར་མནར་ལས།
ལྷན་འཛོམས་ཀྱི་བསྐལ་བ་རྙེད་མ་མྱོང་།
ཉིན་རེ་ནས་ཉིན་རེ་ཟླ་རེ་ན་ཟླ་རེ་ལོ་རེ་ནས་ལོ་རེ།
དབྱར་དགུན་གྱི་དུས་ཚིགས་རེས་སུ་
འཁོར་ཡང་ང་ཚོའི་ཡུལ་དུ་བུ་ཡུག་རྐྱང་རྐྱང་འཚུབ།
མཁྱེན་མཁྱེན་བླ་མ་མཁྱེན་
འོན་ཀྱང་ཨ་ཕ་ལགས།
ཁྱེད་རང་ཐུགས་སེམས་སྐྱོ་མི་དགོས།
འུ་ཚོའི་ཁྱིམ་དུ་བདེ་སྐྱིད་དེ་འདྲ་མེད་ཀྱང་།
ཨ་ཕའི་གདམས་དག་སྔར་བཞིན་དྲོད་ཁོལ་ལྡན།
ཕ་ཤུལ་བུ་ཡིས་འཛིན།
ཕ་ཆོས་སེམས་ཀྱིས་བསྒྲུབ།
ཕ་ཡིག་སྦྱོང་ལ་བརྩོན་དང་ཕ་སྐད་གཙང་མ་བཤད།
ཕ་སྲོལ་རྒྱུད་ཀྱིས་འཛིན།
ཕ་ཟས་རྒྱུན་དུ་རོལ་ལ་ཕ་ཁྱིམ་སྙིང་ནས་བརྩི་བཞིན་ཡོད།
ཨ་ཕ་ལགས།
ངས་བརྗེད་དཀའ་བ་ནི་ཁྱེད་ཡིན་ལ་དྲན་སླ་བ་ནི་ཁྱེད་ཡིན།
ཁྱེད་ནི་བརྩེ་བའི་ཕ་ཡིན།
བྱམས་ལྡན་མ་ཡིན།
སྐྱབས་སའི་ལྷ་ཡིན།
རེ་སའི་དཔོན་ཡིན།
ཁྱེད་ནི་ཕ་གཞིས་ཀྱི་བདག་པོ་ཡིན་ལ།
བུ་ཚང་གི་རེ་བ་ཉག་གཅིག་ཡིན །
ཨ་ཕ་ལགས་ཉིན་མོ་སེམས་སུ་འཁོར་སོང་།
མཚན་མོ་རྨི་ལམ་ནང་དུ་མཇལ།
ཨ་ཕ་ལགས་ཞོགས་པའི་ཉི་གཞོན་གྱི་གཟི་བྱིན་དང་འགྲོགས་ནས།
རང་ཡུལ་ཕྱོགས་སུ་སླེབས་རོགས།
ང་ཚོས་ལོ་ཟླ་སོར་རྩིས་བགྲང་ནས།
ཁྱེད་ལ་རེ་བཞིན་སྒུག་བཞིན་ཡོད།
སླད་མར་ཁྱེད་ཉིད་སྐུ་ལུས་གསེར་གྱི་ཉི་མ་ལ།
སྤྲིན་ནག་པོ་གཡོལ་བ་མེད་པ་རྟག་ཏུ་བརྟན་ཞིང་།
ཕ་བུ་འདི་ནས་གྱེས་ཀྱང་།
སླར་ཡང་འདི་རུ་འཛོམས་པའི་སྨོན་འདུན་ཡང་ཡང་ཞུ།།།།